Drejtori i Burgut të Beratit, Hiqmet Këlliçi po ndiqet penalisht, pasi dyshohet të ketë kryer veprën penale “Shpërdorim Detyre”.

Lajmi bëhet i ditur nga oficerët e SHKB-së së Burgjeve, të cilët kanë përcjellë dje në Prokurorinë e Rrethit Gjyqësor Berat dosjen hetimore në ngarkim të drejtorit Këlliçi.

Drejtori i Burgut të Beratit, Hiqmet Këlliçi është hetuar prej 1-muaji nga Oficerët e Policisë Gjyqësore të Shërbimit të Brendshëm Kombëtar të Burgjeve, të cilët kanë përcjellë pranë Prokurorisë së Beratit edhe hetimet e kryera dhe provat e dëshmitë e grumbulluara.

Sipas ShKB-së së Burgjeve, Hiqmet Këlliçi, akuzohet se favorizonte të dënuarit për “liri me kusht” në këmbim të ryshfeteve. Në dosjen hetimore në ngarkim të tij thuhet se, ai nuk i dëmtonte të dënuarit që, sipas tij, duhet të përfitonin “liri me kusht”, edhe kur ata kryenin shkelje të ndryshme. Në shumë raste të tillë, edhe pse juristi i IEPV-së Berat, përgatiste praktikat dhe ja dërgonte komisionit të disiplinës, ky komision nuk mblidhej asnjëherë për rastet e të burgosurve që favorizoheshin prej tij. Në dosjen hetimore thuhet gjithashtu se, Këlliçi ka shpërdoruar detyrën duke shfrytëzuar autoritetin e tij si drejtues institucioni për rastet e sipërpërmendura, që sipas SHKB-së janë me dhjetëra.

Të pyetur në lidhje me këtë hetim, burime të Prokurorisë së Rrethit Berat konfirmojnë se, çështja penale në ngarkim të Drejtorit të IEPV-së Berat, Hiqmet Këlliçi, ka mbërritur në prokurori ditën e djeshme dhe sot, pas hedhjet së shortit i ka kaluar për hetim njërit prej prokurorëve të këtij institucioni.

Kjo është çështja e dytë penale që po hetohet nga Prokuroria e rrethit të Beratit në ngarkim të drejtorit Hiqmet Këlliçi. Në Dhjetor 2019 ai është akuzuar për “shpërdorim detyre” nga SHKB-ja, pasi shoferi i tij, me urdhër të drejtorit dhe në kundërshtim me ligjin, lejohej të takonte të dënuar të ndryshëm në qelitë e tyre për tu siguruar favore në këmbim të ryshfeteve.

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/

Flash Lajme

Më të lexuarat