Zëvendëskryeministri dhe koordinatori i shtabit qeveritar të krizës, Bujar Osmani ka porositur besimtarët që të mos shkojnë në xhami. Bashkësia Fetare Islame në Maqedoni përmes një njoftimi ka bërë të ditur se këtë të martë do të hapen xhamitë.

“Nuk kemi mënyrë ti mbyllim xhamitë. Nuk ka mundësi ligjore dhe Kushtetuese të mbyllen objektet fetare. Ketu është në pyetje bashkëpunimi mes institucioneve. Unë i inkurajoj të mos shkojnë, deri sa ende jemi në fazë kur nuk jemi të sigurtë”, deklaroi Osmani në TV24.

Bashkësia Fetare Islame nuk ndryshon qëndrimin për hapjen e xhamive. Vendimit të së premtes, vetëm iu shtuan masat se si duhet vepruar. Falja brenda xhamisë do të bëhet në pika të caktuara me qëllim të ruajtjes së distancës. Besimtarët do të mund të falen edhe jashtë xhamisë, por gjithnjë duke respektuar rekomandimet.

“Dryni nga dera e xhamisë që nesër do të hiqet me vendim të Bashkësisë Fetare Islame, mirëpo duke respektuar rekomandimet shëndetësore kundër pandemisë CoVid-19.”

Myftiu i Shkupit Qenan Ismaili sqaron se çdo imam do të sigurohet që po mbahet distanca prej 1.5 metra përpara se të nis falja, duke përdorur maska dhe dezinfektues. Udhëzimet do t’i zbatojë çdo këshill xhamie. Ata me simptoma të gripit nuk do të lejohen të hyjnë, abdesin do ta bëjnë në shtëpi, ndërsa sexhadet do të duhet t’i marrin me vete.

“Këtu do të respektohen të gjitha masat që ka ndërmarr shteti si në vendet tjera publike, si bankat, marketet, e objekte të ndryshme që tani më janë në funksion. Nga ana tjetër, në xhami qëndrohet më së paku. Nuk mund të jetë faktor xhamia sepse ne e shohim si lëvizin njerëzit nëpër tregje e markete.”

Sipas BFI-së, lutjet e së premtes do të bëhen vetëm 10 minuta, kurse ligjërata fetare nuk do të ketë. Për shkak të orës policore, vetëm dy nga pesë vaktet e obligueshme do të mund të falen në xhami.

Qytetarët thonë se do të respektojnë udhëzimet, por ka edhe prej atyre që nuk besoj se CoVid-19 është diçka më e rrezikshme se gripi sezonal.(INA)

Flash Lajme

Më të lexuarat

  • Week

  • Month

  • All